Home / स्थानिय समाचार / के भन्छन निजगढ बासी अन्तर्राष्ट्रिय विमानस्थल र फास्ट ट्रयाक बारे

के भन्छन निजगढ बासी अन्तर्राष्ट्रिय विमानस्थल र फास्ट ट्रयाक बारे

टाँगिया बस्तीका ४५ वर्षीय सामाजिक अगुवासमेत रहेका टाँगिया सरोकार समितिका अध्यक्ष रमेश सापकोटा निजगढमा राष्ट्रिय गौरवको अन्तर्राष्ट्रिय विमानस्थल बनाउने सरकारी निर्णय सुनेर निकै उत्साही र खुसी थिए । उनको दैनिकी विमानस्थल बन्नेबारे चर्चा गर्दैमा बित्थ्यो । विमानस्थलबाट हुने फाइदा/ बेफाइदाबारे उनी धेरैसित दिनहुँ भलाकुसारी गर्थे । अचेल उनी उक्त आयोजनाबारे गफिन चाहँदैनन् । ‘कति चर्चा मात्र सुन्ने/सुनाउने ? काम गरेर देखाउनुपर्‍यो,’ उनी दिक्दार मान्छन्, ‘१५ वर्षदेखि चर्चाबाहेक केही भएको छैन ।’ धरै चर्चाले उत्साह घट्न थालेकाले चाँडै काम सुरु गर्न उनले सरकारलाई सुझाए । उनीजस्तै यस क्षेत्रका राजनीतिकर्मी, उद्योगी व्यवसायीलगायत सर्वसाधारणले विमानस्थलको कार्य छिटो सुरु गर्न सरकारसित आग्रह गरेका छन् । ‘सरकारले आस मात्र देखाउने गरेको छ,’ टाँगिया सरकोकार समितिका सचिव सुमन थोकर भन्छन्, ‘फेरि तारबार लगाउने चर्चा चलेको छ । तर चार किल्ला प्रमाणित नभएसम्म कसरी तारबार हुन्छ ?’ निर्माण कार्यमा भइरहेको ढिलासुस्तीको विरोधमा मध्य तराई, निजगढ, टाँगिया बस्ती सरोकार समिति लगायतकाले पटक पटक प्रदर्शन गर्दा सरकारले बेवस्ता गरेको उनीहरूको गुनासो छ । गत मंसिर २५ मा बारा, पर्सा र रौतहटका सभासदहरूको वीरगन्जमा भएको बैठकले यस क्षेत्रको विकासका लागि विमानस्थल निर्माणमा पहल गर्ने निर्णय गरेका थिए । सरकारी निकायबीच समन्वय हुन नसक्दा र नीतिगत अन्योलताका कारण यो आयोजनाको निर्माणकार्य अघि बढ्न सकेको छैन । विमानस्थल निर्माणका लागि आर्थिक वर्ष ०६७/०६८ देखि हालसम्म सरकारले डेढ अर्ब रुपैयाँभन्दा बढी बजेट विनियोजन गरेको र चालू आर्थिक वर्षमा मात्र ५० करोड रुपैयाँ छुट्याएको छ । ‘जनस्तरबाट दबाब दिन प्रदर्शन गर्दागर्दै थाक्यौं, सरकारी चर्चाले आजित भइसकेका छौं,’ निजगढ सरोकार समितिका संयोजक एकबहादुर श्रेष्ठले भने, ‘आयोजना निर्माण कार्य थालनी नभएसम्म दबाब जारी रहन्छ ।’ क्षेत्र ६ का सभासद एवं युवा तथा खेलकुदमन्त्री पुरुषोत्तम पौडेलले विमानस्थलको डीपीआर (विस्तृत परियोजना प्रतिवेदन) तयार भए पनि नीतिगत निर्णयमा समस्या भएकाले निर्माण कार्य सुरु हुन नसकेको बताए । कोरियन कम्पनी ल्यान्डमार्क वल्र्डवाइडले तयार पारेको प्रतिवेदनमा ८ किमि लामो र ५ किमि चौडाइको विमानस्थलको धावनमार्गका लागि बाराको निजगढस्थित टाँगिया बस्तीमा १०/८ किमि लम्बाईको जग्गा अधिग्रहण गर्नुपर्ने हुन्छ । नीतिगत निर्णयको अभावमा चार किल्ला छुट्याउन नसकिँदा जग्गा अधिग्रहण र बस्ती व्यवस्थापनका लागि सरकारले यस वर्ष छुट्याएको बजेट खर्च पनि हुन सकेको छैन । ल्यान्डमार्कको अध्ययनअनुसार दुई चरणमा पूरा हुने विमास्थल निर्माणमा करिब डेढ खर्ब रुपैयाँ खर्च लाग्ने अनुमान छ । सरकारले ढिलासुस्तीसँगै निर्माणकार्यमा लागत पनि वृद्धि हुने देखिएको छ । ‘जग्गा अधिग्रहण गर्न चार किल्ला प्रमाणित गर्न सरकारले नापी विभागलाई निर्देशन गरिसकेको छ,’ विमानस्थल आयोजना प्रमुख निर्देशक वकिल चिमोरियाले भने, ‘वातावरणीय र सामाजिक प्रभाव मूल्यांकन जाँच्ने प्रक्रियासमेत सुरु भएको छ । काम गर्न प्राविधिक र प्रारम्भिक बजेटसहित सिमरा विमानस्थलमा मुकाम खडा गरी अर्को सातादेखि कार्य सुरु हुन्छ ।’ १२ हजार बिघाको चार किल्ला प्रमाणित गर्नुपर्ने उनले बताए । पुनर्वास चुनौती विमानस्थल मुख्य केन्द्र गढीमाई नगरपालिका १६ को टाँगिया बस्ती हो । यहाँ १४ सय घर धुरीमा झन्डै ६ हजारको बसोबास छ । बाँकीमा घना जंगल छ । वरिपरि कोल्हवी नगरपालिका अन्तर्गतको ककडी प्रसौना, सपहीलगायत निजगढ छेउसम्मको भाग ओगट्नेछ । ठूला र घना बस्ती भएकाले व्यवस्थित ढंगले सार्न चुनौती छ । दोस्रो अन्तर्राष्ट्रिय विमानस्थल बनाउन बस्ती सर्ने भएपछि जंगलभित्र रहेको टाँगिया गाउँको बासिन्दाले सुरक्षित र सुविधायुक्त ठाउँको माग गरेका छन् । तत्कालीन डुमरवाना ७ अन्तर्गत रहेका उक्त गाउँ साढे तीन दशकदेखि छ । यहाँ पिछडिएका तामाङ जातिको बाहुल्य छ । सबै विपन्न छन् । बस्ती व्यवस्थापन गर्न सरकारले वास्ता नगरेको उनीहरूको भनाइ छ । एक घर एक रोजगार, जिल्लाभित्रै घरबास, खेतीयोग्य नि:शुल्क जग्गा उपलब्ध, खानेपानी, स्वास्थ्य, शिक्षा, विद्युत्सहित भौतिक पूर्वाधारको व्यवस्था, बस्ती छाडेको दिनदेखि एक वर्षसम्मको नि:शुल्क खानपानको व्यवस्था हुनुपर्नेलगायत उनीहरूले सरकारसँग माग गरेका छन् । मागको सुनुवाइ नहुँदा टाँगियाका बान्दिालाई यतिखेर बासको चिन्ता भएको छ । बासको समस्या लिएर यहाँका झन्डै १ हजार ४ सय घरपरिवारका ६ हजार बासकै चिन्ताले पिरोलिएका छन् । २०३२ सालमा सरकारले त्यस क्षेत्रमा वृक्षरोपण गर्दा त्यसको रेखदेख गर्न बस्ती बसाएको थियो । पूर्व–पश्चिम राजमार्गबाट ८ किलोमिटर दक्षिण जंगलमा उक्त बस्ती पर्छ । गरिबी, असुरक्षा, खानेपानी, स्वास्थ्य, शिक्षालगायतको समस्या उनीहरूले झेल्दै आएका छन् । केहि समय निजगढमा फास्ट ट्रयाक र निजगढ विमानस्थल छिटो बनाउन दबाब कार्यक्रम पनि गरिएको थियो ।

प्रकाशित मिति: २०७२ असार ५ ०९:३९

साभार कान्तिपुरबाट

nijgadh basi

dabadmulak

Biraj paints Nijgadh 9855021190

About Nijgadh.com