भदौ १५, २०७६ बारा : बाराको निजगढमा प्रदेश २ सरकारका उद्योग, पर्यटन, वन तथा वातावरणमन्त्री राम नरेश रायको पुत्ला दहन भएको छ। बाराको निजगढमा प्रस्तावित दोस्रो अन्तर्राष्ट्रिय विमानस्थल निर्माणका क्रममा रूखहरू काट्न नदिने भनेर अभिव्यक्ति दिएको विरोधमा निजगढको शहिदचोकमा पुत्ला दहन भएको हो।

सामाजिक सञ्जालमार्फत आह्वान गरिएको विरोध कार्यक्रममा स्वतस्फुर्त रूपमा सहभागि भएका निजगढका युवाले पुत्ला दहन गरेका हुन्। इलाका प्रहरी कार्यालय निजगढ र सशस्त्र प्रहरी बेस क्याम्प निजगढको टोलीले हस्तक्षेप गरेर पुत्ला दहन नियन्त्रणमा लिएको थियो। विरोध कार्यक्रममा फास्ट ट्रयाक एयरपोर्ट निर्माण मूल व्यवस्थापन तथा सरोकार समितिका संयोजक रविराज दंगालले संघीय सरकारले शिलान्यास गर्ने तयारी गरेको बेलामा प्रदेश सरकारका मन्त्रीले दिएको अभिव्यक्ति खेदजनक भएको बताए। उनले विमानस्थल बनाउन जनस्तरबाट दबाबमूलक कार्यक्रम सञ्चालन गर्नुपर्ने बताए।

कायक्रममा विमानस्थल सरोकार समितिका संयोजक एकबहादुर श्रेष्ठले विमानस्थल बनाउने तयारी हुन थालेपछि चलखेल हुने गरेको भन्दै त्यसको विरोध गरिएको बताए। सामाजिक सञ्जालमा विरोध प्रदेश २ सरकारका उद्योग, पर्यटन, वन तथा वातावरणमन्त्री रायले दिएको अभिव्यक्तिको सामाजिक सञ्जालमा चर्को विरोध सुरु भएको छ।

प्रदेश २ सरकारले विमानस्थल अहिले प्रस्तावित क्षेत्रमा बनाउन रूखहरू काट्न नदिने र विमानस्थल बनाउन प्रदेशभित्रकै अरू खाली जमिन प्रयोग गर्न संघीय सरकारलाई बुझाउने तयारी गरेको भन्दै समाचार प्रकाशित भएपछि समाजिक सञ्जालमा विरोध सुरु भएको हो।

हेरौ पुरा भिडियो ।