वीरगन्ज : प्रदेश २ मा ‘मुख्यमन्त्री बेटी पढाऊ, बेटी बचाऊ’ अभियान अन्तर्गत छोरी शिक्षा बिमा कार्यक्रम प्रभावकारी बनाउन आठवटै जिल्लामा एकैसाथ बिमा शिवीर सञ्चालन गरिएको छ ।

प्रदेश सरकारले प्रदेश २ का ८ वटै जिल्लामा बिहीबार देखि एकैसाथ छोरी शिक्षा बिमा शिवीर सुरु गरेको गरेको हो । प्रदेश सरकारले अभियान अन्तर्गत प्रदेश २ मा २०७५ माघ १ गतेयता जन्मिएका छोरीहरुको उच्च शिक्षाका लागि १ लाख रुपैयाँको बिमा गर्ने कार्यक्रम एक वर्ष अघि ल्याएको थियो ।

Advertizee

तर सञ्चालनमा आएको एक वर्षमा बिमा कार्यक्रम अपेक्षाकृत रुपमा प्रभावकारी नदेखिएपछि प्रदेश सरकारले प्रदेशका हरेक प्रदेश २ का सबै १ सय ३६ स्थानीय तहमै पुगेर छोरीहरुको शिक्षा बिमा गर्न बिहीबारदेखि सप्ताहव्यापी शिवीर सञ्चालन गरेको हो ।

मुख्यमन्त्री कार्यालय अनुसार २०७५ माघ १ देखि प्रदेश २ मा २२ देखि २५ हजार बालिका जन्मिए । तर बिमा कार्यक्रम सञ्चालन भएपछिको एक वर्षको अवधिमा करिव १० हजार बालिकाको छोरी शिक्षा बिमा गरिएको छ ।

बाँकी बालिका शिक्षा बिमा कार्यक्रमबाट बञ्चित भएपछि सबैको पहुँचमा पुर्याउन बिमा शिवीर सञ्चालन गरिएको मुख्यमन्त्री राउतका स्वकीय सचिव दिपक यादवले जानकारी दिए । बिहीबार वीरगन्जको त्रिजुद्ध मावि परिसरमा आयोजित कार्यक्रममा मुख्यमन्त्री लालबाबु राउतले छोरी शिक्षा बिमा शिवीरको शुभारम्भ गरेका हुन् ।

यस अवसरमा मुख्यमन्त्री राउतले २०७५ माघ १ गते यता जन्मिएका वीरगन्ज ३ की बालिका अरिबा प्रविन र वीरगन्ज २ की रुकैया खातुनका अभिभावकलाई बिमा गरिएको कागजात हस्तान्तरण गरेका थिए ।

बिमा शिवीरको शुभारम्भ गर्दै मुख्यमन्त्री राउतले छोरी जन्मिएका घरघरमै पुगेर उनीहरुको शिक्षा बिमा गराउने लक्ष्य साथ आठवटै जिल्लाका सबै पालिकामा छोरी शिक्षा बिमा शिवीर सञ्चालनमा ल्याइएको बताए ।

मुख्यमन्त्री राउतले निकट भविष्यमै बिमाको रकम एक लाखबाट बढाएर पाँच लाख पुर्याउने प्रदेश सरकारले तयारी गरिरहेको जानकारी पनि दिए । मुख्यमन्त्री राउतका अनुसार बिहीबारदेखि सुरु बिमा कार्यक्रम एक महिनासम्म गाउँपालिकामा एक दिन, नगरपालिकामा दुई दिन, उपमहानगरपालिकामा तीन दिन र महानगरपालिकामा चार दिन छोरी सञ्चालन हुनेछ ।