राष्ट्रिय सहकारी दिवसको अवसरमा निजगढ नगरपालिका कार्यालयले आयोजना गरेको खुल्ला वक्तृत्वकला प्रतियोगितामा निजगढ ५ बागदेवस्थित ऐँचोपैँचो सहकारी संस्थाको तर्फबाट प्रतिनिधित्व गरेकी सरिष्मा चौलागाई प्रथम हुनुभएको छ । ६८औं राष्ट्रिय सहकारी दिवसको अवसरमा ‘ग्रामीण अर्थतन्त्र विकासमा सहकारीको भूमिका’ विषयमा नगरपालिकाले आयोजना गरेको वकृत्वकला प्रतियोगितामा सबैभन्दा बढी अंक प्राप्त गरेर चौलागाईले प्रथम स्थान हासिल गर्नुभएको हो । प्रतियोगितामा चौलागाईले सहकारी र नेपालको ग्रामीण अर्थतन्त्रको सम्बन्ध बारेमा गहकिला तर्क प्रस्तुत गर्नुभएको थियो ।

प्रतियोगितामा पहिलो भएपछि रेडियो निजगढसंग कुरा गर्दै चौलागाईले आफूले राम्रो तयारी गरेका कारण सफल भएको पनि बताउनुभयो ।

त्यसैगरी प्रतियोगितामा निजगढ ७ स्थित लोकप्रिय साकोसकी सम्पदा खरेल व्दितीय र विद्यासागर ईङ्गलिस सेकेन्डरी स्कुलकी साहना पौडेलले तृतीय स्थान हासिल गरेका छन । नगरभित्रका विभिन्न विद्यालय र सहकारी सस्थाको तर्फबाट ९ जना सहभागी सो प्रतियोगिताको निर्णायक मण्डलमा संस्कृति विश्व विद्यालयका उपप्रध्यापक सुदेश सत्याल र मधेस प्रदेश सहकारी रजिष्टार कार्यालयका अधिकृत सुनिल थापा रहनुभएको थियो । नगरपालिकाको सभाहलमा भएको सो कार्यक्रमको संचालन योजना शाखा प्रमुख अजयकुमार उप्रेतीले गर्नुभएको थियो । प्रतियोगिताका विजयीलाई सहकारी दिवसको अवसरमा आज हुने कार्यक्रममा पुरस्कृत गरिने प्रशासन शाखा प्रमुख जिवन गौतमले जानकारी दिनुभयो । उहाँका अनुसार प्रतियोगितामा पहिलो हुनेलाई १० हजार द्वितीय र तृतीय हुनेलाई क्रमस ७ र ५ हजारको दरले नगद पुरस्कार प्रदान गरिने छ । प्रतियोगिताको उद्धाटन कार्यक्रममा निजगढ नगरपालिकाकी उपमेयर सोममाया थिङ्ग, निजगढ नगरपालिकाका निमित्त प्रमुख प्रशासकीय अधिकृत शिवप्रसाद देवकोटा, मधेस प्रदेशका रजिष्टार कार्यालयका अधिकृत सुनिल थापा, प्रशासन शाखा प्रमुख जीवन गौतमले बोल्नुभएको थियो । सहकारी दिवसको अवसरमा नगरपालिकाले आज बिहान प्रभातफेरि र दिउसो अन्तरक्रिया कार्यक्रमसमेत गर्न लागेको छ ।