तामागढी– रतनपुर सडक खण्डको फास्टट्रयाक नजिकै हिजो बिहिबार स्कुटर दुर्घटना हुँदा स्कुटीमा सवार २ जना युवती गम्भीर घाइते बनेका छन ।
घाइते हुनेमा निजगढ नगरपालिका वडा नम्बर १२ की आयुसा गोले र जितपुर-सिमराउपमहानगरपालिका वडा नं १६ टाङ्गियाबस्तीकी आरती योन्जन रहेका छन । आयुसाले चलाएको मधेस प्रदेश ०३– ०२७ प ४६५४ नम्बरको स्कुटर साझ ५ बजे दुर्घटनामा परेको हो । तामागढी– रतनपुर सडकको लाल पार्किङभन्दा केही मिटर तल सडक छेउमा भएको विपरित दिशाबाट आएको क्रेनमा स्कुटर ठोक्किदा उनीहरु घाइते भएका थिए ।
घाइते दुबैको होस नखुलेको र निजगढ सामुदायिक अस्पतालमा सामान्य उपचारपछि थप उपचारको लागि वीरगञ्ज पठाइएको प्रहरीले जनाएको छ ।
क्रेनका चालक जीतपुरसिमरा वडा नम्बर ३ बस्ने निश्चल कार्कीलाई प्रहरीले नियन्त्रणमा लिएको इलका प्रहरी कार्यालय निजगढका प्रहरी निरीक्षक घनश्याम श्रेष्ठले जानकारी दिनुभयो ।
